القصة و الرواية والشعر

عفاف الصادق حمد النيل،،
إمرأة سودانية من الزمن الجميل،،
كتبت أبياتاًمن الشعر لزوجها الفنان أبو عركي البخيت
عندما حان لحظة سفره الى خارج البلاد في فترة ضاقت عليه السبل بالبلاد
كتبت عفاف قائلة:
ويوم تقول داير تسافر
بتستف الحب بين ملابسك ..
شان يلامســك،،،
كل هدماً ترتديهو..
تلاقي فيهو
قليبي حارسك ..
ولما تهدأ فوق وسادتك
تلقي روحي ملت جوانحك ..
ولما تغمض رموش عيونك
أبقي في نومك أزاحمك،،،
ولما تبقي امام مرايتـك
تلقي صورتي كست ملامحك،،
وكل موقف من مواقفك
أبقي قــدرك ..
وأبقي فيهو أنا البشابهك
ولما تمرق لي صحابك
وكل زول بشوق يسالمك ..
تلقي في إيديهو إيـدي
ولمحة من عينيّ تصابحـك ..
حتي في نغمة كلامو
تلقي صوتي مزج سلامو
وتحس بي ،، أنا البصافحــك ..
***
وين تسافر مني تمشي
وين تقبل مني تبــري
ياني فيك أنا امتزجت
بمزج النفس البيطلع
مرة شهقة .. ومرة زفرة
اكون الدم في عروقك
وامشي في شريانك ابرى
مسلك الحب في وريدك
فيه بغرق ومنه بروى
ياني ندك... وليك نديدك
عنك أكتب ومنك أقرأ ..
***
وإلتزاماَ بالقضية
والتمسك بالمبادي
والمبادي هي الحقيقة
والحقيقة العندي هي
لا مساومة لا مساومة
في المقاومة
بي مداومــة
والتزاما حق تماماَ
أنا البريدك
انا البريدك
وين بتمشي بلايا درباَ
وكل درباَ تمشي فيه ..
لي بيودي
وكل حدود الدنيا عندك
هي حـــدي
وين ما قبلت تلقى
إنك إنت مني ليّ
وإنك .. إنت
كل مــا عنــــدي