كلام علي الهواء

فى لقائه مع وزير جمهوريه السنجاب ونائب رئيس جمهوريه الكنجروا الديمقراطيه ووزير خارجيه الجزر الباسفكيه الشرقيه والمرآه الكرويه الجنوبيه ومجموعه من جامعه الدول الوهميه فى جلسه تفاكريه مطوله حول الازمه الكلاميه العالميه والعوز الاكسجينى(قله الاكسجين)0
_يا اخوانا البلد دى سله كلام العالم الموضوع دا خلوا علينا نحن بنصدر ليكم الكلام الخام وانتوا أستثمروا فى مشاريعكم الدايرنا0
_بعد وصوله البلاد اعلن السيد وزير الاستثمار عن اجتماع طارئى حول الموضوع0نحن عندنا موارد كلاميه ضخمه فى البلد دى نحن ليه ما نستثمره0الواحد تلقاءه يتكلم من الخرطوم لبورسودان شوف دا بهدر كم كلمه كلام قدر دا بره يعادل الكلام البستهلكوا فى صناعه الصاروخ ولا تلقاه ماسك موبايلوا ارقى الليل كلو0
_بدايه كدا علشان نلقى طريقه نصدر كلام لازم يكون فى تنظيم فى استهلاك الكلام اليومى بنستفيد منوا فى حاجتين اولا فواتير الكلام دى بتجيب لينا قروش والثانيه يكون فى فائض قيمه كلاميه ودا نحن البنصدر منوا0وبعد داك ممكن نخصخص بعض المناطق كلاميا يعنى تكون حكر للمؤسسه المؤجره ولايسمح لاى جهه باستهلاك الكلام فى المنطقه دى غير المؤسسه 0علشان كده نحن محتاجين لوزاره مختصه بالموضوع دا0
_وتم بسرعه البرق هيكله الوزاره الكلاميه0عثمان كلام وزير الدوله بالوزاره الكلاميه والسيد جادين نضمى المدير العام للهئيه القوميه الكلاميه وبدا العمل فى المشروع0
مشروع الكلام المنضبط
تحت شعار عداد لكل خشم يعنى بركب ليك عداد فى خشمك وبعد داك تمشى مراكز الدفع المقدم للكلام وهى متوفره فى كل منطقه تدفع قروشك يقوموا يدوك فاتوره بها عدد الكلمات على حسب قروشك وفى انواع عدادات كتيره ومختلفه على حسب الحوجه على سبيل المثال لا الحصر عداد الكلم الطيب دا عداد كلامتوا رخيصه وممكن يدوك اي كميه من الكلمات وعداد الكلام المفتوح ودا بتاع الوزراء والفنانين وناس الكلام الكتير ديل وعداد الحنك ودا مخصص للسماسره والجكس دا عداد كلامتوا غاليه جدا لانوا فيوا عائد0
عداد اسكت للدفع المقدم
الاستهلاك اليومى بالكلمات
ونسه على خفيف 05كلمات يوميا
ونسه فى شارع النيل 50كلمه فى اليوم
ونسه فى محلات ستات الشاى 20كلمه يوميا
الناس بقت قافله خشومه وساكته لحدى الناس رجعت للغه الاشاره والتجاره البكماء0تم ضبط المواطنه علويه شمار بالتحدث والثرثره والقطيعه مع جارتها (يعنى عامله ليها جباده كلام )وتمت غرامتها0
_يا بتى امشى جيب ليك فاتوره ب2جنيه علشان تمشى تشكى للدكتور0
_بعد النجاح الكبير والمال الكتير فى الخزينه العامه والجيوب الذى حققه مشروع الكلام المنضبط اعيد النظر فى موضوع الاكسجين 0
-وفى تصريح لوزير الاستثمار رامى كبروص قائلا:يا جمعه البلد دى كلها كتاحه والعجاج بتاعه كتير شديد نحن ليه ما نستثمر الموارد الهوائيه دى وبعدين العالم فيو عوز اوكسجين نحن نستغل الحاجه دى اذا استثمرنا صاح بنكون من اكبر الدول المصدره للهواء0غير كدا مافى ترشيد فى التنفس الواحد تلقى ماشى واضرع اتنفس هواء البلد دى كلو ولا جارى فى شارع المطار بلا شغله اتنفس كميه هواء ممكن تقعدوا اسبوع وبعدين ذى ما عارفين انوا طبقه الاوزون مكونه من اوكسجين وهناك عندنا فى امريكا مهندسين ومقاولين عندهم خلاطات اوكسجين اخلطوا مع نايتروجين وحبه مويه تديك خلطه قويه ممكن تسد بيها ثقب الاوزون0ونحن محتاجين للتصدير لدفع عجله الاقتصاد الوطنى ودى الدرسات الاستراتيجيه للمشروع فكره المشروع انوا يكون فى صمام فى انفك موصل بعداد يقفل الصمام تماما عند انتهاء كميه الاوكسجين المسموح بها 0ونحن علشان نكون عملين وما نستهلك كلام انا عدادى ذاتوا قرب اصفر نشرع طوالى فى المشروع نجيب شركه تأسس لينا مبانى الوزاره بتاعتنا وفى فتره وجيزه تم تشيد وزاره الهواء والنسيم وجات الهيكله كلاتى:
على همبريب ضحاك وزير وزاره الهواء الاتحادى ومنال عجاج المدير العام للهئيه القوميه الهوائيه ونفيسه انضباط المشرف العام على عداد الدفع المقدم وركبوا لاى زول عداد فى انفوا اقصد فى اخلاقوا ودا افاد المواطنين كتير لانوا بقى زهج مافى حته الاخلاق بقوا مركبين فيها العداد مافى اى طريقه تجى الانف0
مركز اختناق للدفع المقدم
الاستهلاك اليومى للهواء
استهلاك فى حاله نوم 1قاروره هواء
استهلاك فى حاله جرى 2قاروره هواء
استهلاك فى حاله مجهود شاق 2_4قوارير
_مما اتاح المشروع لمستثمرين واصحاب الشركات فرصه فى انتاج الهواء النقى الصحى0بعد ما مشيت شلت فاتوره دفعك المقدم ممكن تستهلك نوع الهواء الانت دايروا على حسب نوع عدادك اذا كان عداد هائى يعنى بستهلك الهواء النقى الصحى ولو عدادك وسط كدا يعنى بتتنفس هواء مراوح ممزوجا احيانا ببعض الروائح الكريهه اما ناس العداد القدر حالم ديل(عداد التلوث الهوائى)مناطق الشده ديل بتنفسوا عجاج وتراب وكتاحه وحاجات كده غريبه وعجيبه0خدمه تحويل الهواء لتسهيل المعانه للمواطن وحل بعض المشاكل التى يتعرض لها المواطن ذى زول عداد قرب اصفر فى المواصلات ممكن اى زول جنبوا يحول ليو قدر البحصلوا اغرب مركز استهلاك0
_يا حليمه عليك الله حولى لى ربع قاروره اشم بيها ملاحك دا بهارتوا طالعه0
_ بقى كلام كتير ونقنقه وقطيعه مافى اى زول احسب كلاموا كويس واقولو وناس جر الهواء البتلقى واقف فى الشارع ما عندو اى موضوع الاقيك اجر بيك هواء دى طائفه انعدمت0
-وبفضل مشروع الكلام المنضبط وضيق التنفس اصبحنا من اكبر الدول المصدره للكلام الخام والهواء وساهمنا مساهمه فعاله فى حل الازمه الكلاميه العالميه والعوز الاوكسجين.

اخيرا........

كلام الليل يمحوه النهار..................

مشكـــــــــــــــــــــــور يا سنبل على التخريمات العجيبة دي
ـــــــــــــــــــــــــــــــــــــــــــــــــــــــــــــــــــــــــــــــــــــ
طبعاً هناك في البلد تعاملاتها بتختلف من هنا , أول حاجة لفتت انتباهنا هنا الموية .... الموية بقروش
عشان كده طلع المثل البيقول ليك " وهو الكلام بيقروش ؟" بإعتباروا أرخص حاجة .... ( نزل رصيد ب4ج وعندك 350 دقيقة مجانية داخل الشبكة ) ( المكالمات بعد الساعة 12 مجا.....)
350 دقيقة دي تطلع كم ساعة ؟ كم ساعة ؟ ........
شعب المجاملات والشمارات والرومانسيات ده هيتسلى كيف لو الكلام بقى بيقروش ؟؟؟؟؟؟؟؟؟؟؟؟؟؟؟؟؟؟؟؟؟؟؟
ــــــــــــــــــــــــــــــــــــــــــــــــــــــــــــــــــــــــــــــــــ
هناك في البلد شرقك النيل !!! وغربك الصحراء هواء نقي لمن بهناك .... ده الشغل يا يخلو ذاتو !!!!!!
لكن تجي المايقوما .... وريحة المايقوما .... اسكت خلي !!!!
قلت لناس المايقوما انتو ما ترفعوا شكوى ولا حاجة أصو ما ممكن تسكن مع الريحة دي كده .... واحد نطا
قال : يا زول انت مجون ولا شنو ... الزول هنا ذاتو سلك مع الريحة دي ... الزول لو ما شمى الريحة دي مزاجو ذاتو ما بتعدل .....
ولا بيقدر ينوم .... إلا بعد نشم المسكن دا ........
يا أصلي عايزنا نصدر هواء ونحن ما عندنا ما يكفي للمستهلك المحلي ............