الرئيسيةالرئيسية  س .و .جس .و .ج  بحـثبحـث  التسجيلالتسجيل  دخول  

شاطر | 
 

 عريــس الغـفــلة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
رضوان سعيد
عضو جديد
عضو جديد
avatar

عدد المساهمات : 83
تاريخ التسجيل : 08/09/2009

مُساهمةموضوع: عريــس الغـفــلة   الخميس ديسمبر 17, 2009 1:15 am

كالعادة وخلافاً لكل دول العالم التي تتم فيها مراسم الزواج في يوم أو إثنين وبأقل التكاليف الممكنة نجد أن الزواج السوداني هو عبارة عن مسلسل مكسيكي يستمر لأيام وأيام يجتمع فيها الأهل والأحباب والجيران وجيران الجيران والأقارب من الدرجة الخمسمائة بعد الألف وينفق فيها أموال طائلة تكفى لبناء مستشفى حديث أو فندق 5 نجوم أو رواتب المعلمين فى إحدى المحافظات .
تبدأ الحكاية بعد أن تحس بالقلق عندما تجد أن معظم أصدقاءك قد دخلو القفص الذهبى طائعين مختارين _ أؤمن تماماً بمسألة القفص ولكن لدى تحفظات كثيرة على حكاية ذهبي دي _ المهم تحس بالخطر وتأخذك غضبة حمقاء وتناجى نفسك وأنت فى حفلة زواج أحد الأصدقاء: والله الواحد بعد دا يشوف ليه مرا ، معقول هناى الأهبل دا يعرس وأنا لسه قاعد براى زى تور الساقية ؟ .
عندها يستعرض خيالك قائمة طويلة من معارفك البنات إبتداء من ناس نونة زميلتك فى الروضة مروراً بصديقات مرحلة المراهقة الكتار وحتى زميلات الجامعة والشغل وبنات الحلة وبنات الأعمام والأخوال وباقى الأهل ثم وبسرعة تنسى كل أولئك النساء فى حياتك عندما تسترعى انتباهك الحسناء الجالسة فى ركن قصى فى حفل ذات الصديق الأهبل ، تحبها من أول نظرة وتراقب حركاتها وسكناتها ، تلاحظك هى لكن تعمل ما شايفة وتتلاهى بمكالمة وهمية فى موبايلها وهى ترمقك من طرف خفى كما يفعل الصياد المحترف. المهم تتعارفوا بواحدة من الطرق الكثيرة وجلسة جلستين فى الكافتريا ثم: ياهناى والله انا ما ممكن أطلع وأنزل معاك كدا ساى ، الناس تقول علينا شنو ؟ .
ثم تمسح دمعة وهمية من عينيها فتأخذك الحماسة وتقول: والله ياسوسو _ ودا إسم دلع يقبل آلاف الأسماء منعاً للمشاكل _ أنا ناوى أصل بيتكم بس إنتى عارفة الظروف والعرس بيكلف كتير وووووو... فتقاطعك سوسو بحنية ثعلبية وبنعومة الأفاعي: أنا مادايرة منك شى ، أنت بس تعال أخطب والعرس يتأجل لحد ما الظروف تتحسن . فتصدق الكلام من عوارتك وتحدد يوم الخطبة وتأخذ ثلة من أهلك وقليل من جيرانك وأصدقاءك وتقصد بيت الملاك المختار وتفاجأ أنت وأهلك بحشد كبير فى بيت العروس وخيمة كبيرة أمام البيت وصوت المايكرفون يردد ( تست تست ، واحد ، إتنين تلاتة ، تست تست ) تأخذك الدهشة قبل أن يأخذك أبو العروس جانباً ، يعدل عمته التوتل ثم يقول: والله ياولدى أنحنا خطوبة ومسخرة ودخلة ومرقة ماعندنا ، عشان كدا قررنا نعقد ليكم طوالى والعرس بالراحة.
ثم بأبتسامة محذرة: ولا رأيك شنو ؟ .. وقبل أن تدلى برأيك غير المعتد به أصلاً يكون وكيلك ووكيلها قد أتموا عقد القران فى الخيمة وتحولت أنت بقدرة قادر من مشروع خطيب إلى زوج _ مع وقف التنفيذ _ بسرعة البرق ثم يغمرك المعازيم: مبروك يا عريس مبروك يا عريس بيت مال وعيال.. وأنت كاضم ماقادر ترد وتسمع إحدى عمات العروس وهى تقول: شوفوا يا خوانى من الفرحة لمن ماقادر يتكلم . ثم تطلق زغرودة مدوية وهى تبتعد فتجتاحك معها رغبة فى لكمها فى فمها لتخرس إلى الأبد.
فرغم إنها صارت شرعاً حرمك المصون إلا أنه يجب عليك أن تقوم بطقوس مهولة ومراسم عرس كامل لإستلامها !!! وعندما تثور على الوضع وتحلف بالطلاق أن تمشى تجرها من شعرها وتجيبا بيتك بدون حفلات أو كلام فارغ وتخلص .. تفاجأ بأن المعارضة تأتيك من الداخل أي امك وأخواتك: ليه مادايرنا نفرح بيك ؟ أنحنا أقل من الناس البسوو الأعراس ؟ والله لو ماعملت عرس ماعافيين منك ؟ عليك الله عاين دا ، داير الجارات ياكلن وشنا ؟ .
فترضخ للأمر الواقع وتبيع قطعة أرض ورثتها عن جدك الرابع عشر وترهن بيت أبوك وتبيع الكمبيوتر والموبايل وتزوغ ببعض الصناديق ثم تستلف من 10 – 15 صديق كدا وأخيراً وأخيراً جداً تجد نفسك حالق جديد و لابس بدلة سودا _ لون الحداد !!! _ متأبط شراً هو عروسك المصونة والتى جاءتك فى هيئة فيل صغير بعد أن نجحت وصفات التسمين التى قامت بها العمات والخالات وبعض الصديقات الخبيرات ، تأتيك متدحرجة فى فستان أبيض _ لون الفرح !!! _ فتجلسا تحت بقعة ضوء مزخرفة عليها كرسيان تعرف بالكوشة _ والتى لأول مرة تدرك معناها _ الجميع فى الحفل فى رقص هستيرى والفنان يصدح بسعادة غير مبررة: شن بتقولوا فى الفرح البعذب سيده والريد البضيع زولوا !! . فتلمس الأغنية فيك أوتاراً حساسة وتكاد تطفر الدموع من عيونك ، وتجول عيناك على الحضور السعيد وتتوقف عيونك على آخر العزاب من أصدقاءك وهو يرنو إليك بحسد تارة وتجول عيناه بين الحسناوات تاره أخرى وتكاد تقرأ أفكاره وهو يفكر:هسي فلان الأهبل دا عرس وأنا قاعد براى زى تور الساقية؟. فتكاد تصرخ فيه محذراً ولكن صوتاً خبيثاً فى داخلك يهمس بمكر وحقد: وأنا مالى ، هو أنا فى زول حذرنى ؟ .
الرجوع الى أعلى الصفحة اذهب الى الأسفل
ياسر ابراهيم طه
عضو فعال
عضو فعال
avatar

عدد المساهمات : 41
تاريخ التسجيل : 21/07/2009

مُساهمةموضوع: عريس الغفله   الخميس ديسمبر 17, 2009 1:48 am

والله عسل يا سعادة السفير انت هناااااااك في آخر الدنيا وكأنك هنا حاضر عرس فلان .... في البلد والله نفس التفاصيل والحكايا من لحظه تست تست لحدي ما لمعت عيناك بالمكر وامتنعت ان توصي وانت اصلا ما موصي
ولكن صدقني ليس الامر بكل هذه المحنه والله لما تمسع (تاني قول كدي تاني قول انساك انا اصلو ما معقول ده غرام كم سنه )تنط فوووق وتدك الدلجه تنسي كل التفاصيل الاخري وتتسع ابتسامتك لتشمل كل الحضور
لك سلاماتي الكتييييره
الرجوع الى أعلى الصفحة اذهب الى الأسفل
wd.alshreef99
مشرف المنتدي
مشرف المنتدي
avatar

عدد المساهمات : 207
تاريخ التسجيل : 20/05/2009
العمر : 34
الموقع : المملكة العربية السعودية

مُساهمةموضوع: رد: عريــس الغـفــلة   الخميس ديسمبر 17, 2009 2:17 am

بسم الله ارحمن الرحيم
ألي عباقرة قريتنا مراغة الاخوة الاعزاء / رضوان سعيد و ياسر ابراهيم طه لكم التحية واسعدنا مشاركاتكم
التي دوما نهي رضانا وسعد لنا ونشكر لكم الجهد المبزول منكم ونرحب بكم علي منتديات مراغة التي هي
في مقام منزلنا الكبير وهي التي تجمع بيننا ونحن في بلاد الغربة المريرة وبعدنا عن القرية الخضراء باهلها
الطيبين ونتني منكم المذيد والتقدم في المشاركات القادمة .

[وحدهم المديرون لديهم صلاحيات معاينة هذا الرابط]

[وحدهم المديرون لديهم صلاحيات معاينة هذا الرابط]

_________________
[وحدهم المديرون لديهم صلاحيات معاينة هذا الرابط]
الرجوع الى أعلى الصفحة اذهب الى الأسفل
محمد جعفر
عضو فعال
عضو فعال
avatar

عدد المساهمات : 340
تاريخ التسجيل : 07/11/2009
العمر : 28

مُساهمةموضوع: رد: عريــس الغـفــلة   الخميس ديسمبر 17, 2009 3:07 am

مشكوووووووووووووور يا رائع ...مشكووووووور
يا خي شقيتنا بالضحك ...ههههههههههههههههههههه
لكن زي ما قال ياسر لمن تسمع تست تست تنتظر حبة عشان تعرف ده فنان يمشو ليهو بالجلابية ولا بالبنطلون لكن لمن تسمع (تاني قول كده تاني قول) تشد الجلابية وتفك الحمار بالسرج والفرحة بتنسيك اي حاجة ....
مع خالص تحياتي ..........
الرجوع الى أعلى الصفحة اذهب الى الأسفل
النور إدريس
عضو جديد
عضو جديد
avatar

عدد المساهمات : 94
تاريخ التسجيل : 28/11/2009

مُساهمةموضوع: رد: عريــس الغـفــلة   الخميس ديسمبر 17, 2009 7:59 pm

شنو يارضوان ما نعرس ولا شنو وبمناسبة القفص(لا ادرى كيف اجمع الناس على ان القفص قد صار رمزا للحرية ولو كان من ذهب) هههههه
وهنا حيث الروتين القاتل تجد الاهداف محدده من المجتمع"تلقى شقل وتبنى غرفة وبرنده وبعد داك تبقى مارق مع بت الجيران"
اقايتو انحنا هنا بنحمى الجنس البشرى من الانقراض
لك شكرى وتقديرى
اتخريمه : ذى البدله الابسة دى نلبسه يوم واحد بس فى العمر (ليلة الزفاف والمزارعين يكون لبسو البنطلون والبدله مرة واحدة )هههههه
الرجوع الى أعلى الصفحة اذهب الى الأسفل
رضوان سعيد
عضو جديد
عضو جديد
avatar

عدد المساهمات : 83
تاريخ التسجيل : 08/09/2009

مُساهمةموضوع: عريس الغفلة   الثلاثاء ديسمبر 22, 2009 8:54 pm

الإخوة الأعزاء ياسر/ محمد/ النور ..لكم الود الخالص علي توقيعكم بالمرور.

شايفك يا النور خاتي ليك إستراتيجية خماسية .. شغل ..غرفة.. برندة ..بت الجيران...ثم القفص.
والله أخير تبدأ بالقفص .. صدقني الباقي كلو ملحوق بس إنت ما تلاوز..
الرجوع الى أعلى الصفحة اذهب الى الأسفل
محمد حسن



عدد المساهمات : 8
تاريخ التسجيل : 04/01/2010

مُساهمةموضوع: رد: عريــس الغـفــلة   الثلاثاء يناير 05, 2010 3:25 am

التحيه ليك الاخ رضوان
علي الكلمات الحلوه لكن اقول ليك انو الوضع اتغير الان والمسلسل بدل مكسيكي بقا طاش ما طاش, يعني موضوع العرس اصبح لحظات وينتهي وبقولو الناس اتمدنت
حتي الشيله الي كان تصطف فيها البكاسي بقت0( بتين )في اتوز واحيانا رقشه وانتهي الموضوع اما العوازيم فالواحد قبل ما يتم كبايه الشاي تلقاهو مشى ويلاقيك بعد شهر يمكن ويقول ليك
ما بقيتو تلاته.........
علي فكره النور طبعا حينبسط من الكلام دا خاصه وانو قطع شوط في عش الزوجيه والي حيكون معلم من معالم مراغه. بس انا خايف الجعلي يقول ليه عملتو من وين دا.............
الرجوع الى أعلى الصفحة اذهب الى الأسفل
نسمة وفاء
عضو فعال
عضو فعال
avatar

عدد المساهمات : 152
تاريخ التسجيل : 19/06/2009
العمر : 30

مُساهمةموضوع: رد: عريــس الغـفــلة   الثلاثاء يناير 05, 2010 5:00 pm

ياخ ماتخافو كتير ماحنطلب منكم كتير بس كركة والباقي بتسهل هههههههههههههههههههههههههههه

وماتنسو وسط السوط والرقيص تلمسو جيبكم عشان مايشرد منكم ويزوغ هههههههههههههههههه

كلكم شاردين من العرس وفي الفيس محمود وقدورة وهاني داقين جرس من العرس

وراكم وراكم تفوتو وين هههههههعهعهعهعهعهعهعهععه
الرجوع الى أعلى الصفحة اذهب الى الأسفل
wd.alshreef99
مشرف المنتدي
مشرف المنتدي
avatar

عدد المساهمات : 207
تاريخ التسجيل : 20/05/2009
العمر : 34
الموقع : المملكة العربية السعودية

مُساهمةموضوع: رد: عريــس الغـفــلة   الثلاثاء يناير 05, 2010 5:14 pm

لكم التحية اخوتي /
ان شاء الله كل واحد فيكم يدخل القفص الذهبي ههههه قصدي فراش الموت الفضي
انا ما معاكم بس كدا احسن عشان اخشن ويلا سلام دايريييين الناس القدام الكانو في الرابطه ديل
يعملو ليهم عرس جماعى والمتزوج ياخد واحده دانيه سلف كدا يعني ههههههههههههههه

_________________
[وحدهم المديرون لديهم صلاحيات معاينة هذا الرابط]
الرجوع الى أعلى الصفحة اذهب الى الأسفل
osama asser
عضو جديد
عضو جديد
avatar

عدد المساهمات : 39
تاريخ التسجيل : 26/12/2009

مُساهمةموضوع: رد: عريــس الغـفــلة   الأحد يناير 10, 2010 2:49 am

هاهاهاهاهاهاهاهايا والله اضحكتنى
لك التحية واشكر وارد الله غربتك

[وحدهم المديرون لديهم صلاحيات معاينة هذه الصورة]
الرجوع الى أعلى الصفحة اذهب الى الأسفل
 
عريــس الغـفــلة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: المنتدي العام-
انتقل الى: