الرئيسيةالرئيسية  س .و .جس .و .ج  بحـثبحـث  التسجيلالتسجيل  دخول  

شاطر | 
 

 حكاوي البلد

اذهب الى الأسفل 
كاتب الموضوعرسالة
ياسر ابراهيم طه
عضو فعال
عضو فعال
avatar

عدد المساهمات : 41
تاريخ التسجيل : 21/07/2009

مُساهمةموضوع: حكاوي البلد   الثلاثاء ديسمبر 15, 2009 12:28 am

كنت اعلم انه سيأتي لأني أدرك انه يختزل الكثير من الحكاوي والمواقف وناس الحله لعلهم قد سئموا من حكاويه فلا احد يستطيع أن يحتمل ساعات من النقه فأصبح الكل يتحاشاه وعندما أعود الي البلد يجدني فريسه سهله لنقته وكلامه الكتيييييييييييييييير ولعلي مولع بمثل هؤلاء أرخي لهم حواسي واستمع إليهم بانتباه شديد ابحث عن المفارقه والنكته لعلي استعيد ما فقدت من طول البعاد .
وانتظر صاحبي حتي غادر آخر الضيوف والليل يجمع آخر شعاع ليرحل ، ودفر الباب ودخل ولعله تذكر شيئا فعاد أدراجه ودق الباب
-اهلا وسهلا ,,, مرحبتين حبابك ياخي ما عيب عليك اسبوع انا في البلد يادووووب جاي تسلّم – بادرته بالهجوم حتي اصد مقدماته الطويله وقهقهاته التي لا تتوقف
- ياخي انت ما عارف الظروف ( قش البهائم،اسقي البرسيم،ماروق الجرجير،البقر سقيتو) اهو نحن في الدوامه دي يوماتي وانتو ترطيبه سااااااااااااااكت – وين حاجات السعوديه العصائر والحلاوة ؟ ما تكورك لي شفع السجم ديل يجيبوا لينا حاجه نلوكه
ولم يدع لي فرصه للرد وتركته وانا افكر في الترطيبه المقصوده واقول في نفسي الما عارف يقول .شوكولاته!
وكنت اعلم ان معدته ستنفجر اذا لم يخرج منها حكاويه طوال سنه ونصف هي فترة بعدي عن البلد فمهدت له الطريق حتي يبدأ في نقته وابتلع 7 حلاوات مع شفطتين من العصير اشفقت فيها علي الكبايه ومسح خشمه بطرف جلابيته
وبدا ،،،،،،،،،،،
شووووووووووووف يا صحبي يوم جيت البيت شق الصباح كده ممكن الساعه عشرة ونص حداشر بالليل جيت واقف لط وأنا الّقط كرعيني براحه براحه خايف واحد يشوفني، والا القي ليك خبطه في نص راسي الخبطه دي بتاعه ابوي انا عارف تقل يدو ولما فقت لقيت نفسي مربوط في الوتد بتاع البقرة والزفت داك يضرب فيني وانا ذي الحمار اسب وانعل فيهم حتي امي جاءت وكشّحتني بالتراب وشتمتني ,, يا سجم الرماد يا باطله يا خايبه لميتين انت حتبقي كده،، واسودت الدنيا في وشي وفقدت المنطق أي والله بقيت ما حاسس بي أي حاجه ما تقول لي من السكره لا ابدا صدقني السكره طارات من خبطه ابوي الاولي بي يدو الناشفه ديك
قلت في نفسي انا زول ما فيهو فايده والموت احسن لي من العيشه دي كل يوم ضرب وبهدله ومهانه وفكيت من الوتد ما عارف كيف وبقيت ماشي لحدي ما وصلت رصيف بابور الشركه ،، انت عارفو عالي كيف,, هزيت راسي بالموافقه وانا امنع نفسي من الانفجار ضاحكا حتي يكمل الفيلم الهندي
وقال ,, وقفت ليك يا صحبي في طرف الرصبف وعاينت ليك للمويه وقلت أقرا ليك الحمدو ولا أي سورة لقيت نفسي ما حافظ الا التشهد قلت سيبك سكران وعايز تموت جهنم جهنم !!!!!!!! وعاينت ليك للمويه لقيته بقت بعيده ورجفت من الخوف وحسيت انو رجليني ما شايلني لاكييييييييين تاني اتذكرت وتد البقره والضرب والبعملوهو فيني كل يوم وتقدمت خطوه الي الامام ،،خليك رااااااااجل،،
ورجعت خطوه لي ورا وتذكرت وقلت في نفسي يا ............ عندك تلاته نعجات حاملات تقااااااااااال خليهم يولدوا وبعد داك تعال موت ،، واخدتها فرد جريه لحدي ما وصلت الحله...
وعندما وصل الي هذه النقطه كان قد اغمي عليّ من الضحك ولم استطيع ان اتمالك نفسي .. وخمش هو ما تبقي من الحلاوه وقفز من مكانه ذي الضارباهو عقرب وصاح؛تصدق نعاجي ما عشيتم !!!!!
الرجوع الى أعلى الصفحة اذهب الى الأسفل
محمد جعفر
عضو فعال
عضو فعال
avatar

عدد المساهمات : 340
تاريخ التسجيل : 07/11/2009
العمر : 29

مُساهمةموضوع: رد: حكاوي البلد   الثلاثاء ديسمبر 15, 2009 1:00 am

مشكوووووووووور يا رائع على القصة الجميلة
خليتنا ننفجر من الضحك .....مشكوووووووووور
صحبك ده شكلو داي خبطة تاني...معقووول ما عشى البهايم لحد حسه والبهايم حاااااملة !هههههه
الرجوع الى أعلى الصفحة اذهب الى الأسفل
رضوان سعيد
عضو جديد
عضو جديد
avatar

عدد المساهمات : 83
تاريخ التسجيل : 08/09/2009

مُساهمةموضوع: آه يا بلد   الثلاثاء ديسمبر 15, 2009 2:10 am

وانا في بلد الكلام فيهو بي حساب .. ده لو أصلاً في زول بتكلم مع التاني..
مشتاق للبلد .. لي زول براي .. زول كضاب يملآني نقة..كضب بدون حساب..
مشتاق للبلد...
الـشـوق للبـلـد لــي بهجـتـه وسـمـره
الشـوق لـي مقيـلا ضــم ضــم تـمـره
الشـوق لـي حديثـا ضـم ضــو قـمـره
الـشــوق للـبـلـد جـابـريـتـا وكــكــره
كان الشوق يخفف والله يبـرى جـراح
الرجوع الى أعلى الصفحة اذهب الى الأسفل
??? ????
زائر



مُساهمةموضوع: موضوع جميل   الثلاثاء ديسمبر 15, 2009 4:19 am

تسلم الاخ/ العزيز ياسر ابراهيم على الموضوع المضحك
( قش البهائم،اسقي البرسيم،ماروق الجرجير،البقر سقيتو)
فى زمن تبدلت فيه الاشياء شكلا ومعنى لاقش بهائم ولا حش
قش ولا ولا ولا لذا دوما نحتاج منك للعودة بنا لذلك الزمن الجميل
زكرتنى قصتك موسم الهجرة للشمال للاديب الطيب صال
(ومسح خشمه بطرف جلابيته)تعابير جميلة وبسيطة لذا
نرجو مواصلة مثلهذه القصص وانا اعرف تماما ان زاكرتك
تختزن الكثير من القصص واصل من غير فواصل
سيف شهلى (الاصلى)
الرجوع الى أعلى الصفحة اذهب الى الأسفل
مجاهد باشنتود
عضو فعال
عضو فعال
avatar

عدد المساهمات : 23
تاريخ التسجيل : 19/11/2009
العمر : 26

مُساهمةموضوع: رد: حكاوي البلد   الخميس ديسمبر 17, 2009 7:10 pm

لك التحية الاخ ياسر علي القصة المضحكة
مشتاقيين كتير
انا لوكنت محلك كنت فكيت الضحكه من بدري
وفعلا فلم هندي
اتمني ان لاتنقطع من القصص دي
الرجوع الى أعلى الصفحة اذهب الى الأسفل
ياسر ابراهيم طه
عضو فعال
عضو فعال
avatar

عدد المساهمات : 41
تاريخ التسجيل : 21/07/2009

مُساهمةموضوع: رد: حكاوي البلد   الجمعة ديسمبر 18, 2009 1:09 am

شكرا مجاهد علي المرور والاشواق وانا لما اقول لي ناس المنتدي البلد بخير بقصدك انت وكتيرين ذيك لكم عاطر المحبه وخالص الاشواق بس مسعوووووول من الخير ابو وضاح وينو؟؟؟؟؟ قول ليهو لو ما كنت شغال في سوداتل مكان النت ذاتو لو كنت شغال في هيئه توفير المياه كنت اختفيت وين ؟؟!!
الرجوع الى أعلى الصفحة اذهب الى الأسفل
مجدى باشنتود
عضو جديد
عضو جديد
avatar

عدد المساهمات : 40
تاريخ التسجيل : 18/05/2009
العمر : 40

مُساهمةموضوع: رد: حكاوي البلد   السبت ديسمبر 19, 2009 2:07 am

والله ياحليل البلد وقصصا وانا عارفك ياياسر عندك حاجات من بيت الكلاوى بس تمرق كيييييييف؟؟؟؟؟
بلاهى الجاية من حكاوى البيت الفاضى القدامكم الماكنت بتدخلو الا بعد المغرب ...... بس تسرد لينا حوارات الناس الكانو معاك شبه يومى

غايتو نحن كلو فترة قعد نمشى نبل ريقنا الكلام ناس برلين دييييييييييييك وبتاعين البيتزا الرافعين قزازم ديك
ناس حوتة واخوانو وكتر خير ناس مالك وود الشريف الخلوهم يفرغو شوية من اشواقم فى المنتدى


ابو وضاح جاب لابتوب وعندو خط انترنت مجان 24 ساعة لكن بسوى فى شنو الله يعلم وانا اجتهدت عشان اعرف بس فشلت

بينى وبينك مرة فى زول اقسم انو ابووضاح بجهز فى ديوان شعر كامل وانا اتفاجاءت اللهم اجعلو خير ... ممكن ياياسر صاحبك دة يكتب شعر


تحياتى واشواقى

مجدى
الرجوع الى أعلى الصفحة اذهب الى الأسفل
 
حكاوي البلد
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: المنتدي العام-
انتقل الى: